Frá opnun Kattholts hefur verið starfrækt gæsla á heimilisköttum sem þurfa að dvelja þar í lengri eða skemmri tíma á meðan eigendurnir eru að heiman.

Kattagæslan fer þannig fram að eigandinn pantar gæslu fyrir dýrið.

Kötturinn þarf að uppfylla skilyrði um bólusetningu og ormahreinsun og hafa náð sex mánaða aldri. Fresskettir þurfa að vera geltir og læður teknar úr sambandi. Fullbólusettur köttur hefur fengið báðar grunnbólusetningar og verið bólusettur árlega eftir það. Mikilvægt að eigendur gæti þess að ekki sé meira en ár liðið frá síðustu bólusetningu áður en komið er með köttinn í gæslu.

Heilsufarsbók eða vottorð frá dýralækni þarf að fylgja með sem staðfestir að kötturinn hafi verið bólusettur og ormahreinsaður. Nauðsynlegt er að kettinum fylgi allar upplýsingar um mataræði og heilsufar. Vinsamlegast komið með fæði kattarins meðferðis.

Kötturinn fær rúmgott búr og þar hefur hann allt sem hann þarfnast. Honum gefst kostur á að fara úr búri ef hann vill. Kettir eru með ólíkar þarfir og reynt er eftir bestu getu að koma til móts við þær.

Köttur sem kemur í fyrsta skipti getur dvalið 7-10 daga á hótelinu, en í allt að 30 daga hafi hann komið áður í gæslu.

Gistingu er hægt að panta í síma 567-2909 og/eða með því að senda tölvupóst á kattholt@kattholt.is. Við minnum á að panta tímanlega sérstaklega um páska, sumar og jól, til að vera örugg um pláss.

Verð á sólarhring fyrir einn kött er 1.200 kr. Ef tvær kisur (t.d. af sama heimili) koma saman er verðið 2.000 kr og fyrir þrjár kisur 2.800 kr.